Համայնքային առողջության առաջնային պահպանման ծրագիր

Ծրագրի նպատակը

Աջակցել ԱԱՊ ծառայությունների բարելավմանը Հայաստանի սահմանամերձ, փախստականաբնակ եւ աղքատ գյուղական համայնքներում, դարձնելով այն առավել մատչելի խոցելի խմբերի համար, համայնքների մասնակցությամբ, ապահովելով ծրագրի կայունությունը:

Այս ծրագիրը ստեղծվել է Վայոց Ձորի եւ Սյունիքի մարզերի փախստականաբնակ 47 գյուղերում 1995 թվականին, Օքսֆամ ՄԲ հայաստանյան գրասենյակի կողմից:

Ավելի ուշ, 2000 թ.-ին Օքսֆամ ՄԲ կազմակերպության հանրային առողջապահության թիմը ստեղծեց «Ապավեն համայնքներին» տեղական ՀԿ-ն: Այդ ժամանակից ի վեր մինչև 2008թ. ծրագիրն իրականացվել է ուղղակիորեն «Ապավեն համայնքներին» ՀԿ-ի կողմից, և միայն դրանից հետո ստեղծվեցին առողջապահական հիմնադրամներ: Այժմ ծրագիրն իրականացվում է Հիմնադրամների կողմից:

«Ապավեն համայնքներին» ՀԿ-ն հանդիսանալով հիմնադրամների հիմնադիրն ու հավատարմագրային կառավարիչը, շարունակաբար աջակցում է նրանց կողմից ծրագրերի իրականացման գործընթացին:

2004 թ. նշված ծրագիրը ապացուցեց իր հաջողությունը եւ դարձավ հայտնի երկրում: Այն որպես հաջողված մոդել կրկնօրինակվեց Վորլդ Վիժն Հայաստան կազմակերպության կողմից: «Շարժական բժշկական խմբեր» ծրագիրը ֆինանսավորվել է ԱՄՆ ՄԶԳ / Վորլդ Վիժն -ի կողմից: Իրականացվեց ՀՀ Հյուսիսային մարզերում (Լոռի, Տավուշ եւ Գեղարքունիքի), ինչպես նաեւ Սյունիքի մարզի մի շարք գյուղերում:

Մինչ օրս «Ապավեն համայնքներին» ՀԿ-ն, սերտ համագործակցելով ստեղծված երեք առողջապահական հիմնադրամների հետ, իրականացնում է առողջապահական ծրագրեր ՀՀ Վայոց Ձորի, Սյունիքի, Լոռու, Տավուշի եւ Գեղարքունիքի ավելի քան 140 գյուղերում, ունենալով ավելի քան 85,000 շահառու: Ծրագիրը ֆինանսավորվում է ECHO, Օքսֆամ ՄԲ, Վորլդ Վիժն, ԱՄՆ ՄԶԳ, Գերմանական տեխնիկական համագործակցություն, «Շեն» ՀԿ եւ Ջինիշյան հիշատակի հիմնադրամ կազմակերպությունների կողմից:

Հիմնական գործունեություն

• Առողջապահության ֆինանսավորման աղքատամետ, այլընտրանքային մոդելի ներդրում նպատակային գյուղերում:
• Բուժական կետերի / առողջապահական հաստատությունների շինվերանորոգման աշխատանքների իրականացում:
• Հիմնական բժշկական սարքավորումների տրամադրում:
• Առողջապահական անձնակազմի / բուժքույրերի վերապատրաստում:
• Համայնքների համախմբում, առողջապահության խթանում եւ կրթություն:
• Հիմնական բժշկական պարագաների եւ դեղամիջոցների մատակարարում:
• Առողջապահական հիմնադրամների կարողությունների և ունակությունների զարգացում:
• Շարժական բժշկական խմբերի ստեղծում հագեցած ուլտրաձայնային սարքով, Էլեկտրակարդիոգրաֆով, լաբորատոր եւ այլ օժանդակ նյութերով:
• Շարժական բժշկական խմբերի արտագնա այցելությունների կազմակերպում և հայտնաբերված հիվանդների բուժում տեղերում: